कविता - भरल चगेंरी मुरही चुरा

                          || तिलासंक्रान्ति ||
                      " भरल चगेंरी मुरही चुरा "
                                       

उठ - उठ बौआ रै निनियाँ तोर ।

अजुका   पाबनि   भोरे   भोर ।।

पहिने  जेकियो   नहयबे  आई ।

        भेटतौ तिलबा रे मुरही लाइ ।।  उठ....

ई पावनि छी मिथिलाक पावनि

सब  पावनि   सं   बड़का  छी ।

भरल     चगेंरी      मुरही     चुरा

तिलवा   लाई   उपरका   छी ।।

उपर  देहिया  थर - थर  काँपय

        भीतर मनुआँ भेल विभोर ।।  उठ....

   चहल पहल भरि मिथिला आँगन

 अइ पावनि के  अजब मिठाई ।

आई   देत   जे   जतेक   डुब्बी

 भेटतै   ततेक   तिलबा  लाई ।।

मुन्ना   देखि  भरय   किलकारी

            जहिना वन में कोइलिक शोर ।।  उठ...

बुढ़िया   दादी   बजा   पुरोहित

छपुआ साडी   कयलक दान ।

तील चाऊर बाँटथि मिथिलानी

    एहि पावनि केर अतेक विधान ।।

     "रमण" खिचड़ी केर चारि यार संग

              परसि रहल माँ पहिर पटोर ।।  उठ......

  गीतकार

     रेवती रमण झा "रमण"